La Usc di Ladins

Che ne conësc pa nia la situaziun che an ciafa sön le fonin tres indô telefonades da call center o da roboc automatics che ó te cacé sö contrac de vigni sort y corú. Sëgn él la poscibilité da limité o forsc tó demez daldöt chësta groaria. Cun incö mercui ai 27 de messé vá en forza les regoles nöies dl "Registro pubblico delle opposizioni". Cun l’iscriziun a chësc register, che é debann, pón dé dant le numer de fonin y insciö arjunje che an ne ciafes nia plü telefonades nia dejidrades: che al sides sozietés de telemarketing o venüda direta, implanc automatisá o por inrescides de marcé. Por se scrí ite al register él chëstes poscibilités:

1) da scrí fora le formular sön www.registrodelleopposizioni.it
2) cherdé sö le numer vërt 800 265 265
3) scrí na e-mail cun lapró le formular a iscrizione@registrodelleopposizioni.it
4) mené le formular tres lëtra racomanada

Deache la novité pëia ia incö, él ince da capí che le sît é suraciarié. Al n’é sciöche al pe tröc che n’ó plü nen savëi nia de chëstes telefonades "salvaries".  (pablo)