La Usc di Ladins

La Luna cresc. La é ascendenta. La scontra i segnes che va dal Sagitarie ai Pesc.

Vender
Bondì a duc, ajache scomenzon semper tel segn del Sagitarie che l é chel che aede let per ultim la setemèna passèda, anché ve dighe indodanef en curt che che à a che fèr con el, ma voi indò ve scriver vèlch che tole fora da mie nef liber de remedies. L Sagitarie l é un di trei segnes del ciaut olache tel soreie se stèsc sorì e enceben che magari rue na nigola la no tol demez l ben stèr. Te piat podon meter soraldut proteines perche­che les magnan se les mantegn polito tel corp tanche proprietà nutrizionèla ma se podessa ence se conzeder con picola porzions chel che più ne fèsc gola de carboidrac o ontaries, ajache se cruzian de la proteines l rest se l pèra fora belebon… (tegnan adiment che te la fasa che cresc la Luna no conzede ejagerazions).
Te ort o ju dai èlbres l é i dis da tor su e ju i fruc, percheche i à sia saor miora. Sessaben che chi che à gran cantità de fruc da regoer no i pel fèr dut te chisc dis giusć, ma ic enstesc pel abadèr che chi regoec te la Luna giusta à na saor miora che chi etres! Tel corp l é ora de la chesses, del fià neigher e del pancreas, del fià bianch e de la circolazion del sanch, del fil de la schena. L é na rezeta che à inom ‘bianco star bene’ che l é la combinazion de doi maraveousc agenc naturèi energisanc e de gran benefize: l vin bianch e la sèlvia. I scrif che chesta l é na colaborazion che porta ton, grignoc e relassament da centenees de egn! Chest per 2 rejons: l efet de recostituent nervous del vin e chel revitalisant fisich de la sèlvia. Aldidanché de gra a studies scientifics saon che la ua da vin l é defat n gran recostituent del sistem di nerves. L etanol, jan te la circolazion del sanch, l interagesc coi neurons e l produsc sensazions euforiches con efet antidepressif e che chieta… ma no l é pa na vertola per se enciochèr noe! L’azion analgesica dapodò agesc dal vin soraldut su la giames e l ge porta benesser per via de sia capazità de dilatèr i vajoi del sanch, desenfian la arteries e fajan prevenzion per i emboi. Dapodò l etanol deida a destener duc i muscoi, donca ence chi uterins, fajan passèr i mèi de la mestruazions e l mèl de cef leà a chestes. Embendapò aon entenù che l vin l é n bon calmant naturèl, bon de chietèr via corp e cef. Però se sà che la cantità miora stèsc sun mez e donca spere de no cogner nience l dir, ma per segureza l faghe, che ejagerèr porta dut te n’autra strèda e se pesta te la deprescion e te comportaments compulsives che rua ca da l’ansia! I fenoi (fenoli) e i tanins del vin dapodò i é antivirèi e antibaterics, enveze la ‘antocianines’ e i ‘flavoni’ ge conferesc na azion antitumorèla… ma vèrda tu!!! Amò apede, la no é fenida chiò, tel vin l é vitamina A, B, C e PP, zucres, sèi minerèi, acido tartarich e n muie de potassie. 
L vin miora ence la digestion e l tonifichea duc i orghegn vitèi… n’èga de vita se dijessa, beleche na sort de medejina da tor ogne tant al besegn, zenza ejagerèr…


Deplu te la edizion dl vender, 22 de setember.